Ekonomia

Haxhinasto në takimin e korridoreve Evropiane të transportit TEN-T në Riga

haxhinastoMinistri i Transportit dhe Infrastrukturës, z. Edmond Haxhinasto, mori pjesë në takimin e Ministrave të Transportit të Ballkanit Perëndimor në Riga, organizuar nga znj. Violeta Bulc, Komisionere për Transportin dhe z. Jean Eric Paquet, Drejtor për Zgjerimin e Ballkanit Perëndimor, gjatë zhvillimit të aktiviteteve për korridoret Evropiane të Transportit TEN-T.

Ministri Haxhinasto informoi të pranishmit, se hapi i parë konkret në zbatimin e rrjetit bazë të dakordësuar midis palëve, në kuadër të proçesit të Berlinit, është krijimi i grupit teknik me Malin e Zi, për të përgatitur aplikimin për studim fizibilitetit për projektin e Autostradës Adriatiko-Ioniane, pranë institucioneve financiare në BE, i cili do të mblidhet në Tiranë javës që vjen.

Ai gjithashtu informoi për angazhimin në plotësimin e studimeve dhe programimin e investimeve për Korridorin Veri-Jug, pjesë e kësaj autostrade. “Dëshiroj t’ju informoj se kemi punuar në terma konkrete në lidhje përfundimin e të gjitha studimeve për segmentet e Korridorit Adriatiko – Jonian,  të tilla si Thumanë – Vora, By-pass i Tepelenës,  apo  lidhja Tiranë – Durrës. Sa i takon punimeve kemi pasur  progres  konkret, sa i takon zbatimit të By-passit të Rrogozhinës, atij të Fierit dhe shumë segmente të tjerë pjesë e këtij Korridori”:- tha ai.

Pjese e rëndësishme e proçesit është edhe hekurudha, për të cilën Ministri Haxhinasto deklaroi se qeveria shqiptare është duke i kushtuar shumë vëmendje, nëpërmjet studimit dhe projektimit për lidhjen Tiranë – Durrës dhe me Aeroportin e Rinasit, si dhe për projektin e fizibilitetit për të gjithë rrjetin hekurudhor shqiptar, duke përfshirë edhe lidhjet me fqinjët. Duke falenderuar edhe Komisionin për mbështetjen e dhënë, ai deklaroi aprovimin e financimit të studimit të fizibilitetit për linjën hekurudhore të Korridorit VIII-të, rehabilitimin e segmentit Durrës-Lin-Pogradec, si dhe ndërtimin e linjës së re Lin- Kufiri me Maqedoninë.

Pjese e temave te diskutimit ishin edhe barrierat jo-fizike, të cilat kanë rezultuar me kosto jashtëzakonisht të lartë, në një studim të fundit të Bankes  Boterore, për të cilat Ministri u shpreh se mund të bëhet shumë më tepër, për lehtësimin e kalimeve kufitare.

Duke folur për masa të tjera, Ministri Haxhinasto deklaroi:- “Mbështes shumë idenë se duhet të bëjmë më shumë për qëndrueshmërinë në sistemet e transportit, ku sapo kemi konkluduar një marrëveshje me Bankën Botërore, për mirëmbajtjen e rrjetit rrugor kombëtar me financim rreth 130 milionë USD për 5 vitet e ardhshme, e cila do të na ofrojë shërbime shumë më cilësore në rrugët tona kombëtare.” Ai theksoi, se siguria rrugore është prioritet për sektorin e transportit rrugor shqiptar dhe se ky komponent duhet parë më seriozisht në të ardhmen. “Rezultati që kemi pasur është 25% më pak aksidente në 2 vitet e fundit, i arritur nëpërmjet investimeve në sinjalistikë, të cilat do të vazhdojnë edhe në të ardhmen”- tha ai.

Anetaresohuni ne Forumin e LajmiFundit.al dhe diskutoni e postoni lirisht per te gjitha temat qe deshironi!

Leave a Reply

Your email address will not be published. Required fields are marked *

Back to top button
Close