Moti i keq dhe i thatë godet sektorin energjetik
Moti i thatë dhe me reshje të pakta ka ulur ndjeshëm nivelin në kaskadën e Drinit.
Niveli i ujit në hidrocentralin e Fierzës ka arritur në 267 metra, 22 metra më poshtë se në fillim të vitit dhe afro 30 metra më pak se kuota më e lartë që regjistroi Fierza në muajin maj.
Prodhimi mesatar i energjisë elektrike arrin në 12 mijë megavat orë në ditë.
OSHEE ka nisur importin për mbulimin e nevojave të konsumatorëve me energji elektrike. Në fillim të dhjetorit kompania e shpërndarjes finalizoi një procedurë blerje e cila i kushtoi 12.7 milion Euro, ndërsa ka zhvilluar një tjetër tender për blerjen e 81 mijë megavat orë energji.
Merr lajme ekskluzive në Whatsapp
Doni të informoheni të parët për lajme ekskluzive? Bashkohuni me grupin tonë në Whatsapp duke klikuar këtu.
Moti i keq jo vetëm që ka prekur sektorin e prodhimit të energjisë, por disa zona në vend kanë pasur ndërprerje të energjisë elektrike.
Më i prekuri është rajoni Korçës, ku pati një djegie të transformatorit në nënstacionin e këtij qyteti dhe disa zona mbetën pa energji elektrike. OSHEE njofton se energjia është rikthyer në disa fshatra, dhe po punohet për vendosjen e një transformatori të ri brenda të mërkurës.
Ndërprerje të energjisë ka pasur edhe në rajonin e Burrelit, Kukësit dhe Shkodrës, por koha e riparimit të këtyre defekteve ka qenë më e shkurtër.