“Të verbrës që iu kthye shikimi”, Prifti rrëfen mrekullitë që ka parë me sytë e tij në Kishën e Laçit

Prifti françeskan, Landi Jaku, në një intervistë për Quo Vadis të moderatores Pranvera Borakaj në Vizion Plus, ka rrëfyer disa mrekulli që ka parë me sytë e tij të ndodhin në Kishën e Shna Ndout në Laç.

Ai ka rrëfyer se si një grua në gjendje jo të mirë mendore, u shërua plotësisht pas lutjeve të familjarëve. Një tjetër rast që ai rrëfen është rikthimi i shikimit të një gruaja që jeton ende sot, e cila ishte totalisht e verbër.

Pjesë nga biseda:

Jaku: Më kujtohet një vajzë që kishte kaluar nga mendja, ishte krejt jashtë orbite. Kur e sollën të afërmit e saj për disa të marta rresht, janë lutur për shëndetin e saj. Unë e kam parë me sytë e mi, ajo hante gurë, dhe. Pastaj në momentin që është shëruar është bërë shumë mirë.

E kam parë tani vonë ishte bërë me djalë, dhe ishin të dy shumë mirë. E kam parë me sytë e mi si të sëmurë e kam parë edhe kur ishte e shëruar.

Borakaj: E keni parë në 2005-2006 kur keni shërbyer?

Jaku: Jo se unë vetë për tu bërë Françeskan kam hyrë në Kuvend në 1993-in, që në atë kohë mbaj mend, pak përpara para se të vija si superior i Françeskanëve. Shumë njerëz thonë dhe tregojnë mrekulli nga më të ndryshmet. Një grua e cila është bijë këtu është martuar diku tjetër e kishte humbur komplet shikimin. E sollën këtu, u lutën me shpirt e fitoi dritën e syve.

Ajo është gjallë edhe sot. Një tjetër më ka treguar një punëtor i joni, që ishte një zotëri prej Mirditës dhe ishte në ndjekje të policisë, dhe ai e kishte bërë niet të vinte të lutej këtu dhe erdhi. E vuri re prej larg se policia po e ndiqte, dhe ndryshoi rrugë u fut nga përroi i Kishës, dhe thotë ky punëtori jonë u bë i gjithë vendi mjegull, dhe as policët nuk e shihnin njëri-tjetrin.

Borakaj: E pabesueshme!

Jaku: Dhe thotë që policët u kthyen mbrapsh. Siç duket ai i ka rënë rreth e rreth dhe ka shkuar në shtëpinë e vet. Aq të fortë e ka patur besimin sa Zoti e ka ndihmuar të humbasë gjurmët.