Bilanci/ 137 zjarrvënës të identifikuar dhe 46 arrestuar në 3 muaj

Policia e Shtetit bën me dije se në tre muajt e fundit, nga qershori deri më 14 gusht, janë identifikuar 137 persona që kanë vënë zjarr në mënyrë të qëllimshme në Shqipëri. Nga këta, 46 janë arrestuar ndërsa 91 ndodhen nën hetim në gjendje të lirë.

Shumë prej zjarrvënësve janë kapur në flagrancë falë monitorimit nga ajri me dronë. Strukturat operacionale të Policisë vazhdojnë të kontrollojnë dhe monitorojnë zonat e rrezikuara për të parandaluar vatrat e reja.

Ndërkohë, punonjësit e policisë bashkëpunojnë ngushtë me grupet e emergjencave civile dhe zjarrfikësit për të shuar vatrat aktive dhe për të minimizuar dëmet në bujqësi, blegtori dhe banesa, pas një periudhe që ka shkaktuar edhe një viktimë.

Njoftimi i Policisë së Shtetit:

Strukturat e Policisë së Shtetit në të gjithë vendin, përgjatë muajve qershor, korrik dhe deri sot, janë angazhuar maksimalisht për identifikimin, kapjen dhe arrestimin e autorëve të zjarrvënieve.
Prej qershorit deri më datë 14 gusht, strukturat e Policisë kanë identifikuar 137 autorë të zjarrvënieve, nga të cilët 46 janë arrestuar, ndërsa 91 janë proceduar penalisht.
Ndërkohë, Forcat Kombëtare të Sigurisë, Forcat e Posaçme “Shqiponja”, Patrullat e Përgjithshme dhe Forcat Operacionale, në drejtimin e drejtuesve të qarqeve dhe të Drejtorisë së Përgjithshme të Policisë së Shtetit, vijojnë të jenë në terren, duke ndihmuar në evakuimin e banorëve dhe duke mbështetur Emergjencat Civile dhe zjarrfikësit, për shuarjen e flakëve.
Strukturat operacionale të Policisë së Shtetit po kontrollojnë dhe monitorojnë zonat me dronë, për të identifikuar në kohë personat që shkaktojnë zjarr, duke djegur pronën private, banesa, pyje, kullota dhe, në shumë raste, duke rrezikuar seriozisht jetën e banorëve, punonjësve të Policisë, zjarrfikësve dhe Emergjencave Civile.
Policia e Shtetit apelon për të gjithë banorët që të mos shkaktojnë zjarre. Blegtorët dhe fermerët janë përgjegjës për tokat dhe kullotat që kanë në pronësi apo në përdorim.
Thirrje për të gjithë banorët: mos ndizni zjarr për djegien e mbetjeve të prodhimeve bujqësore apo për pastrimin e territorit, pa njoftuar dhe marrë masa me instancat përgjegjëse.
Shkaktimi i zjarrit, me qëllim apo nga pakujdesia, është vepër penale dhe Policia e Shtetit po punon, në bashkëpunim me banorët, për identifikimin, kapjen dhe arrestimin e të gjithë atyre që shkaktojnë zjarre.