Vrasja e Ilaria Sulës, rrëfehet i dashuri filipinez: E vrava kur prindërit ishin në shtëpi, trupin e futa në...

Detaje të reja kanë dalë në dritë për vrasjen në Itali të 22-vjeçares shqiptare Ilaria Sula, trupi i pajetë i së cilës u gjet në një valixhe, në një zonë të pyllëzuar.

I dashuri i saj filipinez, Mark Samson ka rrëfyer se e ka vrarë Ilarian në shtëpinë e tij dhe në një kohë kur prindërit e tij ndodheshin aty, por kjo nuk i përfshin ata në hetim. 23-vjeçari u dërgua në komisariat në agim ku u mor në pyetje nga prokurorët e koordinuar nga zv/prokurori Giuseppe Cascini, i prokurorisë së Romës. Gjatë marrjes në pyetje që ka zgjatur disa orë, ish i dashuri i saj ka orientuar hetuesit drejt valixhes ku kishte vendosur trupin e pajetë të 22-vjeçares.

Ai tha në polici se Ilarian e kishte goditur disa herë me thikë në banesën e tij që ndodhet në Via Homs. Samson më pas ka zbuluar se kufomën e ka futur në një makinë për ta transportuar drejt pyllin që ndodhet 40 kilometra larg kryeqytetit.

I riu po ashtu ka treguar se kishte hequr qafe thikën duke e hedhur në një kazan mbeturinash dhe celularin, të cilin e kishte hedhur në një pusetë në zonën e Montesacro, por dy objektet nuk janë gjetur ende. Pas krimit ai ka vazhduar të përdorë celularin e Ilarias, duke fshirë rrjetet sociale dhe duke u shkruar miqve të shqiptares. Në përpjekje për të larguar dyshimet, ai shkoi edhe në shtëpinë e shoqes së Ilarias, duke u shfaqur i shqetësuar për zhdukjen e saj.

Megjithatë, gjatë marrjes në pyetje nga prokurorët, ai nuk ka dashur të japë shpjegime për mënyrën e kryerjes së krimit, se kur ka ndodhur, për motivin dhe pse e ka hedhur trupin pikërisht në atë pyll në fund të një përroi, pranë bashkisë së Polit.

“Më vjen keq për atë që bëra”, tha ai para hetuesve që e lidhën motivin me përfundimin e marrëdhënies romantike.