Adriatik Lapaj denoncon për shpifje Agron Shehajn

Ashtu siç e paralajmëroi 5 ditë më parë në emisionin “Opinion” në Tv Klan, kreu i “Nismës Shqipëria Bëhet”, Adriatik Lapaj ka denoncuar në Gjykatën e Posaçme për shpifje Agron Shehajn.

Ai është shprehur se ka të paktën 8 raste të dokumentuara të shpifjes. Kujtojmë se në emisionin e të enjtes së kaluar (27 Mars), kreu i partisë “Mundësia”, Agron Shehaj në studion e emisionit “Opinion” solli disa dokumenta të cilat sipas tij tregojnë se kreu i “Nismës Shqipëria Bëhet”, Adriatik Lapaj përfshihet në çështje pronash në bregdetin e Shqipërisë.

Shehaj në fjalën e tij u shpreh se është e vështirë të gjesh një pronë në bregdet që s’ka futur hundët Adriatik Lapaj, duke nënkuptuar se janë shumë çështje, për të cilat janë në dijeni si kryetarët e partive të mëdha e të vogla, ashtu edhe media, por nuk flasin.

Ndërkohë nuk vonoi shumë edhe përgjigja live e Adriatik Lapajt, i cili bëri të ditur se do të padisë deputetin Agron Shehaj ditën e hënë për akuzën e shpifjes.

Lapaj ndërhyri në emision, duke i dërguar një mesazh në celular drejtuesit të emisionit Blendi Fevziu, ku bëri me dije publikisht se denoncimi ndaj deputetit do të bëhet në fillim të javës së ardhshme.