Divjakë/ Tonelata patate futen në magazina, fermerët: S'ka treg dhe çmimi është i ulët

Në Divjakë, patatja po shitet me 25 deri 30 lekë për kg, por edhe më këtë çmim nën kosto, fermerët thonë se nuk po gjejnë treg. Për të shpëtuar nga ditët e ftohta, kultivuesit po magazinojnë tonelata patate, me shpresë se deri në mars do arrijnë ta shesin, në të kundërt prodhimin do hidhet në kanal.

Në fushat e Divjakës, fermerët po mbledhin dhe magazinojnë tonelata patate, e cila ka mbetur e pa shitur.

'Pikë muhabeti, nuk ka treg. E kemi futur në për shtëpia. Nuk shitet. Këto pikat e mëdha të grumbullimit herë marrin herë s’marrin. Sivjet skandal fare’, tha banori.

'Përveç mungesës së tregut, edhe atë pak prodhim që shesin fermerët detyrohen ta japin me çmim të ulët', tha një tjetër.

Patatja sot në Divjakë është nga 250 lekë deri në 300 lekë. Po nuk ka tregtarë. Edhe ata që marrin, marrin nga 10-15 arka. Nuk më intereson mua të marr punëtorin, do 30 mijë lekë. Vij këtu dhe shkul me gruan. Ne kemi ngel si peshku pa ujë. E fusim brenda atje në magazinë, po u shit u shit, po s’u shit, ta nxjerrim prape ta hedhim në kanal’, tha banori.

‘Do e mbash deri në shkurt mars, ose do e nxjerrësh me këtë çmim ose do e hedhësh. Çmimi përtokë, tregu zero. Jemi të detyruar tani nga i ftohti, po i fusim brenda se po i kapi ndonjë brymë i prish fare, i kalb’, tha banori.

Sipas fermerëve puna dhe djersa e tyre shkon dëm pasi futet patate nga importi. Por të njëjtin fat kanë edhe kultura të tjera.

‘Po nuk doli jashtë, hyn nga jashtë patate. Ne nuk duam të bëjmë politikë. Ne duam të marrim djersën tonë, nuk e marrim dot. Do mbjellësh 7 -8 kultura, do fitosh në dy do humbasësh në 5. Është bërë shumë e vështirë bujqësia këto 2-3 vjetët e fundit. Se dimë, pse s’ka, e di qeveria, është shumë dobët. Edhe karota po ashtu. Marrin nga dy tre kuintalë, tregtarë s’ka. Ja karota në tokë, ja lakra në tokë’, tha banori.

Brenda një viti bujqësor, vetëm në Divjakë mbillen 600 deri në 700 hektarë me patate. Kjo kulturë në Divjakë përbën burimin kryesor të të ardhurave për fermerët e zonës.