Nga “shpërblimi” te shkarkimi, Ina Bello largohet nga drejtimi i Tatimeve të Durrësit për performancë të dobët

Ina Bello, drejtoresha e Drejtorisë Rajonale të Tatimeve në Durrës, është shkarkuar nga detyra për shkak të performancës së dobët në udhëheqjen e institucionit. Ky vendim vjen pas mangësive të evidentuara në realizimin e objektivave të vendosura nga administrata qendrore tatimore, si dhe pas problemeve në menaxhimin e burimeve njerëzore dhe eficiencën e kontrolleve tatimore.

Drejtoria Rajonale e Tatimeve në Durrës ka një rëndësi të veçantë për administratën tatimore, pasi është një nga strukturat më të ngarkuara dhe më me peshë në mbledhjen e të ardhurave buxhetore, duke reflektuar drejtpërdrejt në rezultatet financiare të shtetit. Për këtë arsye, çdo mangësi në menaxhimin e saj ka pasoja të drejtpërdrejta në funksionimin e administratës tatimore dhe në efektivitetin e politikave të tatim-paguesve.

Sipas burimeve të afërta me hetimet, Ina Bello është kritikuar për dështimin në arritjen e treguesve të performancës, për problemet në menaxhimin e stafit dhe për mospërmbushjen e objektivave të kontrollit dhe mbledhjes së tatimeve. Gjatë periudhës së saj në drejtim, janë konstatuar mangësi që kanë çuar në vlerësimin se drejtoria nuk ka operuar në nivelin e pritshëm. Ky shkarkim vjen në një periudhë kur administrata tatimore është nën presion për të rritur të ardhurat dhe për të luftuar informalitetin në ekonomi.

Gjithashtu, burimet thanë se Ina Bello ishte emëruar drejtoreshë në Durrës pas një periudhe ku kishte shërbyer si inspektore në Tatimet VIP, dhe që nga ajo kohë u përfol se ishte përdorur për të goditur biznese të caktuara. Ajo ishte shpërblyer me këtë post për shërbimet e saj, por duket se këto nuk ishin të mjaftueshme për të siguruar qëndrueshmërinë në postin e drejtoreshës.