Rritje çmimesh nga ushqimet te karburantet, si u shtrenjtua jeta për shqiptarët gjatë muajit gusht?

Rritja e çmimeve është përshpejtuar në gusht, duke u rritur me 3.2%, nga 3.4% në korrik.  Ky është muaji i tretë radhazi që norma e inflacionit e ka tejkaluar objektivin e Bankës së Shqipërisë prej 3%.

Krahasuar me muajin Gusht 2025 rritja më e madhe e çmimeve vërehet në grupin “Transporti” me 12,0%, pasuar nga “Argëtim, sport dhe kulturë” me 5,4%, “Sigurime dhe shërbime financiare” me 4,6%, “Qira, ujë, energji elektrike, gaz dhe karburante të tjera” me 3,7%, “Ushqime dhe pije joalkoolike”, “Mobilje, pajisje shtëpie dhe mirëmbajtje e shtëpisë” dhe “Kujdes personal dhe mallra e shërbime të ndryshme” me 2,8% secili, “Pije alkoolike dhe duhan” me 2,4%, etj. Nga ana tjetër, çmimet e grupit “Veshje dhe këpucë” u ulën me 3,2%, pasuar nga grupi “Informacioni dhe komunikimi” me 1,0%.

Sipas INSTAT rritja vjetore e çmimeve në muajin gusht është ndikuar kryesisht nga grupi “Ushqime dhe pije joalkoolike” me +0,95 pikë përqindje, pasuar nga grupi “Transporti” me +0,79 pikë përqindje.

Gjithashtu, çmimet e grupit “Qira, ujë, energji elektrike, gaz dhe karburante të tjera” ndikuan me +0,76 pikë përqindje, çmimet e grupit “Mobilje, pajisje shtëpie dhe mirëmbajtje e shtëpisë” me 0,19 pikë përqindje, çmimet e grupit “Restorante dhe shërbime akomodimi” me + 0,13 pikë përqindje, çmimet e grupeve “Pije alkoolike dhe duhan” dhe “Kujdesi personal dhe mallra e shërbime të ndryshme” me +0,12 pikë përqindje secili.

Çmimet e grupit “Argëtim, sport dhe kulturë” u rriten me +0,11 pikë përqindje, çmimet e grupeve “Shërbimi arsimor” dhe “Sigurime dhe shërbime financiare” me +0,07 pikë përqindje secili dhe çmimet e grupit “Shëndeti” me +0,06 pikë përqindje. Nga ana tjetër çmimet e grupit “Veshje dhe këpucë” ndikuan me -0,12 pikë përqindje dhe çmimet e grupit “Informacioni dhe komunikimi” me -0,04 pikë përqindje.

Në mbledhjen e fundit, në fillim të gushtit Banka e Shqipërisë, e cila ka si objektiv kryesor ruajtjen e stabilitetit të çmimeve dhe këtë objektiv e administron përmes normës bazë të interesit, vendosi të mbajë të mbajë të pandryshuar normën bazë në 2.5%, pavarësisht sinjaleve të qarta në rritje të inflacionit.

“Inflacioni i çmimeve të konsumit erdhi në rritje, si pasojë e efekteve direkte dhe indirekte të rritjes së çmimeve të naftës në tregjet e huaja, si dhe e kërkesës së qëndrueshme për mallra e shërbime. Megjithatë, niveli i inflacionit mbetet i kontrolluar dhe pranë objektivit të Bankës së Shqipërisë”, tha guvernatori Sejko.

Ai shtoi se inflacioni parashikohet të qëndrojë pranë, por mbi objektiv, në periudhën afatshkurtër dhe të zbresë gradualisht drejt objektivit në periudhën afatmesme. Në këto rrethana, goditja e ofertës nga tregjet ndërkombëtare pritet të ketë efekte kalimtare në ekonominë e vendit, shtoi ai.

Ndërkohë edhe në Eurozonë inflacioni u përshpejtua në gusht, duke arritur në 3.3%. Ndryshe nga Banka e Shqipërisë, Banka Qendrore Europiane e ka rritur njëherë normën bazë pak javë më parë.

Me inflacionin në Eurozonë që ka arritur në 3.3% dhe kostot e energjisë në rritje të fortë, tregjet po parashikojnë një tjetër rritje të normave të interesit nga Banka Qendrore Europiane më 10 shtator. /Monitor/