Ishte shitës makinash, tani princ/ 26-vjeçari zbulon se është djali i Princit të Belgjikës

Një 26-vjeçar belg ka kaluar nga puna si shitës makinash në një jetë brenda familjes mbretërore, pasi është njohur zyrtarisht si djali i Princit Laurent të Belgjikës.

Clément Vandenkerckhove, i lindur nga marrëdhënia e Princit Laurent me këngëtaren belge Wendy Van Wanten, është njohur ligjërisht si djali dhe trashëgimtari i tij. Ceremonia e njohjes është zhvilluar në mënyrë diskrete rreth gjashtë muaj më parë, ndërsa lajmi është bërë publik vetëm tani.

Me njohjen zyrtare, Vandenkerckhove merr titullin princ, por nuk do të përfitojë pagesë nga fondet publike dhe nuk do të jetë pjesë e linjës së trashëgimisë së fronit belg. Gjithashtu, ai nuk pritet të marrë pjesë në aktivitetet publike të familjes mbretërore.

Pavarësisht statusit të ri, 26-vjeçari nuk është i sigurt nëse do të përdorë mbiemrin aristokratik Saxe-Coburg, pasi shprehet krenar për mbiemrin e nënës së tij, Vandenkerckhove.

“Mund të dua ta bëj këtë, por jam krenar për mbiemrin Vandenkerckhove”, është shprehur ai për Het Nieuwsblad, duke shtuar se ndryshimi i mbiemrit do të ishte “një tradhti ndaj gjithçkaje që nëna ime ka bërë për mua”.

E mësoi identitetin e babait në moshën 16-vjeçare

Historia e Clément është edhe më e pazakontë. Në vitin 2013, kur ishte ende fëmijë, ai u takua rastësisht me Princin Laurent në një qendër tregtare, pa e ditur se bëhej fjalë për babanë e tij.

Vetëm në moshën 16-vjeçare, nëna e tij i tregoi identitetin e të atit.

Katër vite më vonë, Clément mori guximin ta telefononte Princin Laurent. Pas disa komunikimeve, të dy u takuan dhe ishte vetë princi që propozoi kryerjen e një testi ADN-je.

Analiza, të cilën të dy e kryen në spital, konfirmoi një përputhje prej 99.5% të ADN-së.

Historia e tij u bë e njohur për publikun belg edhe përmes një dokumentari televiziv të transmetuar vitin e kaluar.