Konflikti në Lindjen e Mesme prek Ngushticën e Hormuzit/ Irani kërcënon të sulmojë anijet me mallra, rriten tensionet me Kinën

Konflikti në Lindjen e Mesme mund të çojë në ndërprerjen e korridorit më të rëndësishëm të transportit detar në botë.

Irani është zotuar se do të sulmojë çdo anije që përpiqet të kalojë nëpër Ngushticën e Hormuzit.

E gjithë kjo po rrit çmimin e energjisë, naftës dhe gazit natyror. Ngushtica e Hormuzit është kanali i ngushtë pranë bregdetit të Iranit. Këtu rrjedh gati 20% e konsumit global të naftës.

Dje, një zyrtar i lartë i Gardës Revolucionare të Iranit tha se ngushtica është e mbyllur dhe nëse dikush përpiqet të kalojë, Irani do t’u “vërë flakën anijeve”.

Ndalimi i saj mund ta armiqësojë Kinën. Kina është importuesja më e madhe në botë e naftës bruto dhe blerësi më i madh i naftës iraniane.

Një zëdhënës i ministrisë së jashtme të Pekinit deklaroi se Kina u kërkon të gjitha palëve të ndërpresin menjëherë operacionet ushtarake, të parandalojnë përshkallëzimin e mëtejshëm të tensioneve, të mbrojnë sigurinë e lundrimit përmes Ngushticës së Hormuzit dhe të shmangin shkaktimin e një ndikimi më të madh në ekonominë globale.