Rusia godet kompleksin ku banon ambasadori shqiptar në Kiev, ministri Hoxha: E papranueshme! Përfaqësuesi rus thirret për ...

Qeveria shqiptare ka reaguar pas valës së fundit të sulmeve ruse me raketa dhe dronë ndaj Ukrainës, gjatë së cilës është goditur edhe kompleksi rezidencial ku jeton ambasadori i Shqipërisë në Kiev.

Përmes një reagimi në rrjetin social X, ministri për Evropën dhe Punët e Jashtme, Ferit Hoxha, dënoi ashpër sulmet, duke i cilësuar ato si një tjetër akt agresioni ndaj popullsisë civile dhe një shkelje të rëndë të normave ndërkombëtare.

Sipas ministrit, goditja e kompleksit ku banon diplomati shqiptar tregon rrezikun e vazhdueshëm me të cilin përballen qytetarët dhe përfaqësuesit diplomatikë në Ukrainë. Ai theksoi se sulmet ndaj zonave të banuara nuk mund të justifikohen dhe përbëjnë një kërcënim serioz për jetën e njerëzve.

“Shqipëria dënon me forcë një tjetër sulm brutal në shkallë të gjerë me raketa balistike dhe dronë të nisur mbrëmjen e fundit nga Rusia ndaj objektivave civile në Ukrainë, në një shpërfillje totale të jetës dhe dinjitetit njerëzor.

Këtë herë u godit kompleksi rezidencial ku banon Ambasadori i Shqipërisë në Ukrainë, duke e vënë jetën e tij në rrezik serioz. Kjo është e papranueshme!

Targetimi i zonave civile dhe vënia në rrezik e personelit diplomatik përfaqëson një përshkallëzim të rëndë dhe një tjetër kujtesë të zymtë të kostos njerëzore të agresionit të vazhdueshëm të Rusisë.

Kjo luftë e zgjedhur nga Rusia ka zgjatur shumë gjatë. Për më shumë se katër vjet që nga pushtimi i paligjshëm në shkallë të gjerë, Rusia ka targetuar pa pushim infrastrukturën energjetike, shkollat, spitalet dhe shtëpitë në të gjithë Ukrainën. Megjithatë, ajo nuk ka arritur të thyejë guximin, vendosmërinë, qëndrueshmërinë dhe forcën e popullit ukrainas.

Rusia nuk po fiton; ajo vetëm po vret, po nxit vuajtje dhe shkatërrim.

Ne përsërisim thirrjen tonë ndaj Rusisë që të ndërpresë menjëherë këto sulme, t'i japë fund luftës kundër Ukrainës, të respektojë plotësisht ligjin ndërkombëtar dhe të kthehet në negociata.

Shqipëria do të vazhdojë të qëndrojë fort pranë Ukrainës dhe përsërit mbështetjen e saj të palëkundur për sovranitetin, pavarësinë dhe integritetin territorial të Ukrainës. Ata që janë përgjegjës për këto sulme duhet të mbahen përgjegjës.

Ambasadori i Federatës Ruse në Shqipëri është thirrur për shpjegime”, shprehet ministri Ferit Hoxha