"Prano" apo "Refuzo" Cookies? Çfarë ndodh me internetin kur i bllokojmë

Cookies janë skedarë të vegjël që faqet e internetit vendosin në pajisjen tënde për të të njohur herën tjetër që vizitoni. Falë tyre, reklamat që sheh janë të lidhura me interesat e tua, faqet mbajnë mend çfarë ke parë, dhe bizneset dijnë kush kthehet e kush jo.

Por gjithnjë e më shumë njerëz po i refuzojnë. Dhe kjo, sipas një studimi të ri nga Universiteti i Bostonit, po krijon një problem serioz për mënyrën se si funksionon interneti falas siç e njohim.

Studiuesit analizuan 200 milionë reklama dhe gjetën se heqja e cookies pakëson të ardhurat e faqeve të internetit me mbi një të tretën. Në vendet me ligje më të rrepta privatësie, si ato të Bashkimit Evropian, humbja ishte edhe më e madhe, rreth 66 përqind. Me pak fjalë: pa cookies, shumë faqe nuk fitojnë para. Pa para, shumë faqe nuk mund të ekzistojnë falas.

Ky është paradoksi i internetit modern. Ne dëshirojmë privatësi, gjë plotësisht e kuptueshme. Por privatësia ka një çmim që shpesh nuk e shohim: rrezikon të shndërrojë internetin e lirë dhe të hapur në një hapësirë ku gjithçka kërkon abonim ose regjistrim.

Alternativat që janë provuar deri tani nuk kanë funksionuar mirë. Google tentoi për gjashtë vjet të krijojë një sistem të ri të quajtur Privacy Sandbox, i cili do të mbrojte privatësinë por do të mbante reklamat funksionale. Rezultati? Studiuesit zbuluan se ky sistem rikuperoi vetëm rreth 4 përqind të të ardhurave të humbura. Projekti u braktis.

Çështja nuk ka zgjidhje të thjeshtë. Askush nuk dëshiron të ndiqet nëpër internet. Por as nuk dëshiron të paguajë për çdo faqe lajmesh, blog apo video që shikon. Dikush duhet ta financojë atë përmbajtje dhe sot, ai dikush janë reklamuesit që veprojnë nëpërmjet cookies.

Për përdoruesin e zakonshëm, vendimi mbetet personal. Por herën tjetër që të shfaqet ajo dritare, ia vlen të mendosh pak para se të klikosh "Refuzo të gjitha".