WhatsApp heq PIN-in 6-shifror/ Ja çfarë duhet të ndryshoni në cilësime për të mbrojtur llogarinë tuaj

WhatsApp po ndryshon mënyrën e mbrojtjes së llogarive dhe po zëvendëson PIN-in gjashtëshifror të verifikimit me dy hapa me një fjalëkalim më të sigurt.

Sipas ndryshimeve të reja, përdoruesit do të duhet të krijojnë një fjalëkalim me të paktën tetë karaktere, i cili duhet të përmbajë një kombinim shkronjash dhe numrash. Për një nivel edhe më të lartë sigurie mund të përdoren edhe karaktere speciale.

Përdoruesit që e kanë aktivizuar më herët verifikimin shtesë do të mund ta zëvendësojnë PIN-in ekzistues me fjalëkalimin e ri përmes cilësimeve të llogarisë.

E-maili bëhet i rëndësishëm për rikuperimin

Një tjetër ndryshim i rëndësishëm lidhet me adresën e e-mailit. WhatsApp po u kërkon përdoruesve të lidhin llogarinë me një adresë të vlefshme e-maili, e cila do të shërbejë si një mënyrë shtesë për rikuperimin e aksesit.

Kjo është veçanërisht e rëndësishme në rast se përdoruesi harron fjalëkalimin. Pa një adresë e-maili të vlefshme, mundësitë për rikthimin e aksesit në llogari mund të jenë më të kufizuara.

Sipas WhatsApp, ndryshimet synojnë të forcojnë sigurinë e përdoruesve dhe të vështirësojnë përpjekjet për marrjen e llogarive përmes kodeve të dërguara me SMS.

Mbrojtje e re edhe për thirrjet nga numra të panjohur

Ndryshime të tjera po vijnë edhe për përdoruesit e Android-it, veçanërisht në lidhje me thirrjet nga numra të panjohur.

Kur një përdorues merr telefonatë nga një numër që nuk e njeh, aplikacioni pritet të shfaqë informacione shtesë rreth telefonuesit, përfshirë shtetin nga vjen telefonata dhe nëse të dy përdoruesit kanë grupe të përbashkëta.

Përditësimet po shpërndahen gradualisht përmes versioneve të reja të aplikacionit, ndaj jo të gjithë përdoruesit mund t’i shohin ndryshimet në të njëjtën kohë.