I nxori ar'mën manovër 4 policëve për të mbrojtur të vëllanë në kërkim/ Arrestohet 41-vjeçari në Elbasan

Një 41-vjeçar është arrestuar në Elbasan pasi ka kanosur me një armë të dyshuar manovër katër punonjës policie, të cilët po kryenin kontrolle për kapjen e vëllait të tij, i shpallur në kërkim për armëmbajtje pa leje.

Ngjarja ka ndodhur në lagjen “Visarion Xhuvani”, ku efektivët e Forcës Operacionale të DVP Elbasan ishin angazhuar në operacionin për kapjen e shtetasit me iniciale B. B.

Gjatë ndërhyrjes, vëllai i tij, 41-vjeçari B. B.(Ç.), dyshohet se u ka drejtuar armën efektivëve, duke i kanosur gjatë kryerjes së detyrës. Policia e ka arrestuar në flagrancë, ndërsa sendi i dyshuar si armë zjarri është sekuestruar.

Njoftimi:

Kanosi me armë të dyshuar manovër, punonjësit e Policisë të angazhuar për kapjen e vëllait të tij (shtetas në kërkim), arrestohet 41-vjeçari.

Sekuestrohet sendi i ngjashëm me armën e zjarrit.

Specialistët e Hetimit të Krimeve të DVP Elbasan, në bashkëpunim me oficerët e Policisë Gjyqësore të Prokurorisë, arrestuan në flagrancë shtetasin B. B.(Ç.), 41 vjeç, banues në Elbasan.

Ky shtetas, në lagjen “Visarion Xhuvani”, ka kanosur me armë të dyshuar manovër, 4 punonjës të Forcës Operacionale të DVP Elbasan, gjatë kryerjes së kontrolleve dhe veprimeve operacionale të tjera, për kapjen e vëllait të 41-vjeçarit, shtetasit B. B., që është në kërkim për veprën penale “Mbajtja pa leje dhe prodhimi i armëve, armëve shpërthyese dhe municionit”.

Ndërkaq, vijojnë intensivisht kontrollet për kapjen e shtetasit B. B..

Materialet procedurale iu referuan Prokurorisë, për veprime të mëtejshme, për shtetasin B. B.(Ç.), për veprat penale “Kanosja për shkak të detyrës” dhe “Mbajtja pa leje dhe prodhimi i armëve, armëve shpërthyese dhe municionit”.