Pse çmimi i naftës rritet shpejt, por zbret ngadalë?

Rënia e çmimit të naftës në tregjet ndërkombëtare nuk reflektohet menjëherë në çmimet e karburantit në pikat e shitjes, shkruan New York Times.

Sipas raportimit, kjo ndodh për shkak se furnizimet e stacioneve të karburantit blihen më herët dhe me çmime të ndryshme, ndaj efektet e uljes së tregut global vijnë me vonesë për konsumatorin.

Një pronar karburanti në SHBA tregon se rritjet e shpejta të çmimeve i detyrojnë bizneset të reagojnë menjëherë, ndërsa uljet e çmimeve aplikohen më ngadalë për të mos dëmtuar fitimet dhe për të ruajtur stabilitetin financiar.

Ekspertët theksojnë se kjo është një sjellje tipike e tregut të karburanteve, ku konsumatorët reagojnë më fort ndaj rritjeve të çmimeve sesa ndaj uljeve të vogla, duke ndikuar në mënyrën si bizneset i përshtatin çmimet.

Një tjetër arsye lidhet me faktin se fitimet kryesore të pikave të karburantit nuk vijnë vetëm nga shitja e naftës, por edhe nga shërbimet dhe produktet shtesë që ato ofrojnë.

Në SHBA, rritjet e çmimeve kanë sjellë edhe ndryshime në sjelljen e konsumatorëve, të cilët po kufizojnë sasinë e karburantit që blejnë dhe po kërkojnë alternativa më ekonomike.

Në përgjithësi, ekspertët theksojnë se çmimi në pompa nuk ndjek në mënyrë të menjëhershme tregjet ndërkombëtare, por përshtatet gradualisht me dinamikat e kostos dhe kërkesës.