" Ai nuk e di çfarë flet", Trump sulmon Merz: Nuk është rastësi që Gjermania po shkon kaq keq

Donald Trump ka reaguar me tone të ashpra ndaj kancelarit gjerman Friedrich Merz pas komenteve të këtij të fundit për konfliktin dhe negociatat me Iranin, duke e akuzuar për mungesë njohurish dhe duke sulmuar gjendjen ekonomike të Gjermanisë.

Në një postim në platformën Truth Social, Trump shkroi se Merz “nuk e ka idenë për çfarë po flet”, pasi kancelari gjerman deklaroi se Irani po tregohet më i fortë nga sa pritej dhe se SHBA-së i mungon një strategji bindëse në negociata.

Trump theksoi se nëse Irani do të zotëronte armë bërthamore, e gjithë bota do të mbahej peng, ndërsa shtoi se ai po bën atë që duhej bërë prej kohësh nga liderët e tjerë.

Nga ana tjetër, Merz kishte deklaruar se udhëheqja iraniane po “poshtëron” Shtetet e Bashkuara dhe kishte ngritur pikëpyetje mbi qartësinë strategjike të Uashingtonit. Ai paralajmëroi se hyrja në konflikte është më e lehtë sesa gjetja e një daljeje, duke sjellë si shembuj Afganistanin dhe Irakun.

Sipas kancelarit gjerman, mbetet e paqartë se çfarë rruge do të ndjekin SHBA-të për të dalë nga kriza aktuale, ndërsa vlerësoi se pala iraniane po negocion me aftësi të lartë.