Dyshohet për rrjedhje të dhënash mbi Air Force One/ Nisin hetimet për ish-Sekretarin e Forcave Ajrore të SHBA-së

Ish-Sekretari i Forcave Ajrore të Shteteve të Bashkuara, Frank Kendall, është përfshirë në një hetim lidhur me dyshimet për zbulimin e paautorizuar të informacionit të klasifikuar mbi Air Force One. Pentagoni ka vendosur t’i revokojë Kendallit aksesin në informacionet e klasifikuara, si dhe të drejtën për të mbajtur poste që kërkojnë leje të posaçme sigurie.

Lajmin e bëri të ditur zëdhënësi i Pentagonit, Sean Parnell, i cili deklaroi se masa është marrë pas zbulimit të paautorizuar të informacionit të klasifikuar lidhur me aftësitë e avionit presidencial në një media. Sipas Pentagonit, mbrojtja e informacionit sekret është një detyrim i pakushtëzueshëm dhe shkeljet e këtij detyrimi mund të çojnë në humbjen e aksesit dhe të posteve që kërkojnë një nivel të tillë sigurie.

Kendall drejtoi Departamentin e Forcave Ajrore nga korriku 2021 deri në janar 2025, gjatë administratës së presidentit të atëhershëm, Joe Biden.

Në qendër të vëmendjes, avioni i ri presidencial

Çështja vjen në një kohë kur siguria e avionit të ri që përdoret nga presidenti amerikan, Donald Trump, është kthyer në temë debati. Bëhet fjalë për një Boeing 747 me vlerë rreth 400 milionë dollarë, të dhuruar nga Katari për Shtetet e Bashkuara.

Mediat amerikane kanë ngritur pikëpyetje mbi masat e sigurisë së avionit, përfshirë sistemet mbrojtëse dhe modifikimet e nevojshme për ta përdorur atë si Air Force One. Administrata Trump ka ndërmarrë gjithashtu hapa ndaj gazetarëve që kanë raportuar mbi çështjen, ndërsa Sekretari i Mbrojtjes, Pete Hegseth, ka njoftuar krijimin e një task force të përbashkët me Departamentin e Drejtësisë për të hetuar rrjedhjet e informacioneve të ndjeshme në media.

Në këtë kuadër, vendimi ndaj Frank Kendall pritet të shtojë edhe më shumë vëmendjen mbi mënyrën se si po trajtohen informacionet e klasifikuara që lidhen me sigurinë e presidentit amerikan.