Tornadoja merr jetën e një gruaje në Itali, një tjetër viktimë nga përmbytjet (VIDEO)

Vala e motit të keq që po godet aktualisht Italinë ka shkaktuar vdekjen e dy grave.

Mëngjesin e sotëm, një grua humbi jetën nga mbytja në një kalim rrugor në të cilin kishte hyrë me makinën e saj, në rajonin e Friulit, në verilindje të Italisë.

Pak kohë më parë, në rajonin e Toskanës, një tornado shkaktoi vdekjen e një gruaje që ndodhej brenda apartamentit të saj.

Ndërsa po përpiqej të mbyllte një dritare, xhami u thye për shkak të erës së fortë, duke i shkaktuar një plagë fatale në qafë.

Dhjetëra makina u dëmtuan nga rënia e pemëve në Romë, ndërsa dy stacione qendrore të metrosë u përmbytën për shkak të reshjeve të dendura.

Në qytetin e Astit, në rajonin veriperëndimor të Piemontes, Departamenti i Zjarrfikësve mori gjithashtu rreth 70 thirrje dhe ndërhyri për t’u ardhur në ndihmë banorëve të apartamenteve në katet përdhese dhe pronarëve të dyqaneve.

Pas mesnatës, pritet një përmirësim gradual i kushteve të motit në të gjithë vendin.