"Shqipëria dixhitale përdoret për të vjedhur"/ Berisha: AKSHI i ri do përdoret për të zhdukur miliona euro

Kryetari i Partisë Demokratike, Sali Berisha, ka reaguar pas episodit të fundit të podcastit “Flasim” të kryeministrit Edi Rama, ku u diskutua për konferencën ndërqeveritare Shqipëri-Bashkimi Europian të mbajtur në Bruksel.

Në një videomesazh të publikuar në rrjetet sociale, Berisha e lidhi fjalimin e Ramës me akuzat e tij të vazhdueshme për korrupsion dhe mungesë transparence në qeverisje.

Ai ngriti pretendime edhe për mënyrën e menaxhimit të projekteve dixhitale dhe procesin e integrimit europian.

Berisha u shpreh se pjesëmarrja e Ramës në Bruksel nuk përfaqëson qytetarët shqiptarë, por interesa të tjera politike dhe grupime të lidhura me qeverinë. Ai komentoi gjithashtu vendimet e fundit të raportuara në kuadër të marrëveshjeve dhe ndryshimeve institucionale.

Në videomesazh, kreu i opozitës iu referua edhe projektit “IBAR”, duke e cilësuar si të ndryshuar përmes disa amendimeve që sipas tij prekin parimet e transparencës dhe luftës kundër korrupsionit. Ai përmendi gjithashtu proceset zgjedhore dhe raportet ndërkombëtare.

Duke folur për sistemet dixhitale, Berisha kritikoi krijimin dhe funksionimin e strukturave të reja teknologjike në administratë, duke i krahasuar me projekte të mëparshme të qeverisë.

Ai solli edhe shembuj krahasues mes dy projekteve simbolike dixhitale të prezantuara në politikë, duke i përdorur si argument për kostot dhe mënyrën e menaxhimit të tyre.

Videomesazhi i plotë:

Në serialin e mashtrimeve të dielës, Edi Rama sot u ndal në konferencën ndërqeveritare që u mbajt në Bruksel.
Së pari duhet theksuar se në Bruksel ai nuk shkoi si përfaqësues i shqiptarëve, po shkoi si përfaqësues i familjes mafioze Agasi dhe Çyrbja, të cilat i dekoroi pikërisht ditën që u nis për Bruksel dhe ditën që firmosi marrëveshjen për IBARI-n.
Këto janë akte të shëmtuara, të cilat janë të denja vetëm për kryetar organizatash kriminale dhe jo kryetar qeverish.
Kurse përsa i përket IBARI-t, të gjithë shqiptarët sot e morën vesh se u bënë 32 amendime nga më të fortat, me të cilat provohen se Edi Rama ka shkelur parimet më kryesore të luftës kundër korrupsionit dhe transparencës.
Lubi Balluku është përmendorja e zezë në atë dokument, farsa elektorale është përmendore tjetër e zezë në atë dokument, ndaj dhe ne shprehim mirënjohje për të gjitha vendet anëtare të cilat përmbysën atë raport dhe i dhanë Edi Ramës përgjigjen e merituar.
Në serialin e tij ai u ndal tek AKSHI i ri, pasi AKSHI i lindave u damkos si organizatë e strukturuar kriminale, Edi Rama për të vazhduar vjedhjet, krijoi një AKSH të ri që e quajti ‘Albanian Digital Solution’.
Dua t’ju jap vetëm një shembull.
Dje ju patë në kuvendin e Partisë Demokratike avatarin ‘Skënderbe’ i cili kushton, ka kushtuar gjithsej të 100 euro, ndërkohë avatari i Edi Ramës, Diella ka kushtuar rreth 4 milionë euro.
Pra, sipërmarrjet e tij dixhitale janë, sipërmarrje në të cilat, janë kofshët e tij private në të cilat ai, i pangopur vjedh qindra e qindra milionë euro.
Si përfundim mund të themi se me Edi Ramën integrim nuk ka dhe nuk mund të ketë, se Shqipëria dixhitale me Edi Ramën përdoret për të vjedhur, për të rrjepur qytetarët shqiptarë. Faleminderit.