Nis të zbatohet amnistia penale për 1300 të burgosur, lirohen 541 të parët

Ka nisur këtë të mërkurë zbatimi i ligjit për amnistinë penale në të gjitha institucionet e ekzekutimit të vendimeve penale në vend, duke sjellë lirimin e menjëhershëm të qindra të dënuarve dhe ulje dënimi për qindra të tjerë.  

Sipas të dhënave zyrtare të bëra publike nga Ministria e Drejtësisë, 541 persona përfitojnë lirim të menjëhershëm nga burgjet, ndërsa 803 të dënuar përfitojnë ulje dënimi. Gjithashtu, 173 raste përfitojnë nga rillogaritja e dënimit dhe 67 të dënuar nga bashkimi i dënimeve. Nga ana tjetër, 609 persona nuk përfitojnë nga amnistia, pasi nuk plotësojnë kriteret e parashikuara në ligj.

Institucionet e vuajtjes së dënimit me numrin më të lartë të të liruarve janë Lushnja me 127 të liruar, Fieri me 104 dhe Reçi me 101 te liruar.   

Ministri i Drejtësisë, Toni Gogu ka deklaruar se nga amnistia nuk përfitojnë personat e dënuar për vepra që jane hetuar nga SPAK dhe GJKKO-së, si dhe autorët e një sërë veprave të rënda penale të përjashtuara me ligj.

Nga amnistia e këtij viti, bie në sy Rozeta Dobi, e dënuar për vjedhjen e banesës së ish-zyrtares Alda Klosi dhe Erisa Fero, e dënuar në një çështje të lidhur me trafik narkotikësh ish-punonjëse e AKSHI-t.

Procesi i lirimit po zhvillohet në të gjitha burgjet e vendit nën mbikëqyrjen e autoriteteve përgjegjëse dhe pritet të përfundojë brenda ditës. Amnistia synon, krahas efektit humanitar për kategori të caktuara të të dënuarve, edhe uljen e mbipopullimit në institucionet e vuajtjes së dënimit.