Arinjtë “pushtojnë” Japoninë, 13 të vd'ekur e mbi 220 të plagosur, autoritetet futin në punë AI-n

Japonia po përballet me një nga periudhat më të rënda të konflikteve mes njerëzve dhe arinjve, me një numër rekord sulmesh të regjistruara gjatë vitit të fundit. Sipas të dhënave të autoriteteve, 13 persona kanë humbur jetën dhe më shumë se 220 të tjerë janë plagosur nga sulmet e arinjve në periudhën nga prilli 2025 deri në mars 2026.

Me afrimin e vjeshtës, autoritetet janë vënë në gatishmëri, pasi kjo është periudha kur arinjtë kërkojnë intensivisht ushqim përpara dimrit.

Një nga arsyet kryesore të rritjes së incidenteve është zgjerimi i zonave të banuara në territoret që dikur ndanin qartë vendbanimet nga pyjet. Humbja e tokave bujqësore ka bërë që kufiri mes zonave urbane dhe habitateve të arinjve të bëhet gjithnjë e më i paqartë.

“Me humbjen e tokës bujqësore që dikur mbronte vendbanimet nga arinjtë, kufijtë midis qyteteve dhe pyjeve janë bërë shumë më të paqartë”, shpjegon studiuesi i jetës së egër Liam Adcock.

Në të njëjtën kohë, numri i arinjve në Japoni është rritur ndjeshëm. Kufizimet më të forta për gjuetinë dhe rënia e numrit të gjuetarëve kanë favorizuar shtimin e popullatave të ariut të murrmë në Hokkaido dhe ariut të zi aziatik në pjesë të tjera të vendit.

Sipas vlerësimeve, Japonia ka aktualisht rreth 57 mijë arinj. Edhe ndryshimet klimatike po e përkeqësojnë situatën.

Burimet natyrore të ushqimit, si manaferrat, perimet dhe lisat, po shfaqen më vonë ose janë më pak të bollshme në disa zona. Për pasojë, arinjtë detyrohen të kërkojnë alternativa dhe një prej tyre janë mbeturinat e njerëzve. Kjo i ka shtyrë kafshët të afrohen gjithnjë e më shumë me zonat e banuara.

Vetëm gjatë vitit të kaluar janë raportuar rreth 50 mijë raste të arinjve pranë vendbanimeve. Qeveria japoneze e ka cilësuar situatën si një kërcënim serioz për sigurinë publike dhe ka ndërmarrë masa për të kontrolluar popullatën e arinjve. Plani i autoriteteve parashikon reduktimin e numrit të tyre në disa rajone deri në vitin 2030.

Megjithatë, ekspertë të jetës së egër argumentojnë se eliminimi i kafshëve nuk është zgjidhja e vetme. Në Japoni po përdoren gjithnjë e më shumë teknologjia dhe metoda alternative për të parandaluar përplasjet mes njerëzve dhe arinjve.

Në disa zona të prekura nga prania e arinjve, përfshirë Gunma, Toyama dhe Ishikawa, janë instaluar kamera me inteligjencë artificiale në pyjet pranë zonave të banuara. Kamerat janë në gjendje të identifikojnë arinjtë dhe të sinjalizojnë menjëherë autoritetet.

Kjo u jep banorëve kohë për t’u paralajmëruar dhe autoriteteve mundësinë për të ndërhyrë përpara se kafsha të afrohet më tej. Në Hokkaido është krijuar gjithashtu një sistem me dronë që mund të vihet në përdorim brenda pak minutash pasi raportohet një ari. Droni mund të ndjekë lëvizjet e kafshës nga ajri derisa të mbërrijnë autoritetet.

Ekspertët thonë se teknologjia mund të jetë një mjet efektiv për zbulimin dhe largimin e arinjve, por kostot e larta e bëjnë të vështirë përdorimin e saj në shkallë të gjerë. Për këtë arsye, në disa komunitete japoneze është rikthyer një zgjidhje shumë më e pazakontë: një robot që duket si ujk.

I njohur si “Ujku përbindësh”, roboti është një kopje mekanike e një ujku, e pajisur me energji diellore dhe sisteme zëri e lëvizjeje. Pajisja kushton rreth 4 mijë dollarë dhe është krijuar për të trembur arinjtë duke imituar tingujt e një ujku. Qëllimi është t’i mbajë kafshët larg zonave të banuara dhe tokave bujqësore.

Kompania që e prodhon ka raportuar se shitjet janë dyfishuar pas rritjes së numrit të rasteve kur arinjtë janë shfaqur në qytete. Ndërkohë, po zhvillohet edhe një version më i vogël dhe më i lëvizshëm, i përshtatshëm për kampistët, peshkatarët dhe personat që kalojnë kohë në natyrë.

Një tjetër mënyrë për të parandaluar incidentet është përdorimi i aplikacioneve që informojnë qytetarët në kohë reale. Inxhinieri Daniel Koka ka krijuar “Kumamap”, një hartë dixhitale që mbledh të dhëna mbi sulmet dhe shikimet e arinjve. Informacioni merret nga autoritetet lokale, mediat dhe raportimet e verifikuara të qytetarëve.

Qëllimi është që njerëzit të dinë se cilat zona paraqesin rrezik përpara se të udhëtojnë ose të hyjnë në habitatet e arinjve. Aplikacioni ka fituar përdorim të gjerë në Japoni. Deri në fillim të gushtit, ai kishte regjistruar më shumë se 156 mijë incidente dhe kishte arritur rreth 6 milionë përdorues.

Ndërkohë, studiuesit po eksperimentojnë edhe me metoda më tradicionale. Qendra e Kërkimit të Jetës së Egër Picchio po trajnon qen të specializuar për të zbuluar praninë e arinjve dhe për t’i larguar ata nga zonat e banuara. Sipas studiuesve, në qytetet ku është përdorur kjo metodë janë regjistruar më pak incidente, pavarësisht rritjes së përgjithshme të takimeve mes njerëzve dhe arinjve.

Me afrimin e vjeshtës, kur kafshët shtojnë kërkimin për ushqim përpara dimrit, Japonia pritet të përballet me një tjetër periudhë të vështirë. Autoritetet po përpiqen të gjejnë një ekuilibër mes mbrojtjes së qytetarëve dhe ruajtjes së faunës së egër, ndërsa teknologjia po shndërrohet në një prej mjeteve kryesore për të shmangur përplasjet vdekjeprurëse.