Kuba akuza SHBA-në: Po përpiqet të shpikë një pretekst për sulm ushtarak

Ministri i Jashtëm kubanez Bruno Rodriguez akuzoi të dielën qeverinë amerikane se ka sajuar një pretekst “mashtrues” për të justifikuar vazhdimin dhe zgjerimin e sanksioneve kundër vendit të tij, një “luftë ekonomike të pamëshirshme” dhe një “sulm ushtarak” të mundshëm kundër saj.

Komentet e diplomatit kuban pasuan një raport të Axios dje se Havana po planifikonte të sulmonte bazën ushtarake amerikane në Gjirin e Guantanamos me më shumë se 300 dronë që kishte blerë së fundmi.

“Kuba as nuk kërcënon dhe as nuk dëshiron luftë”, theksoi zoti Rodriguez nëpërmjet X, duke shtuar se vendi “po përgatitet të përballet me një sulm nga jashtë duke ushtruar të drejtën e tij për mbrojtje legjitime, të njohur nga Karta e OKB-së”.

Sipas Axios, Havana po harton plane për të sulmuar, përveç bazës në Guantanamo anijeve luftarake amerikane dhe ishullit Key West, Florida.

Ministri i Jashtëm Rodriguez nuk e përmendi shprehimisht publikimin në komentin e tij.

Raporti, i cili citon dokumente të klasifikuara për të cilat Axios thotë se është informuar nga agjencitë e inteligjencës amerikane, tregon shkallën në të cilën administrata e Presidentit republikan Donald Trump e sheh Havanën si një kërcënim, duke pasur parasysh zhvillimet në kryerjen e operacioneve ushtarake me mjete ajrore pa pilot dhe praninë e këshilltarëve ushtarakë iranianë në Havanë.

Raporti vjen në sfondin e përshkallëzimit të tensioneve dypalëshe; zyrtarët në Havanë akuzojnë Uashingtonin për përgatitjen e terrenit politik për një sulm në ishull.

Për Ministrin e Jashtëm Kuban Rodríguez, disa media po “luajnë lojën” e administratës Trump, “duke promovuar shpifje dhe duke riprodhuar rrjedhje informacioni nga vetë qeveria amerikane”.