Miliarda euro humbje/ Pasojat e rënda për Europën, nga një luftë që po e bëjnë të tjerët

Evropa po përballet sërish me një tronditje të fortë ekonomike, pasi pasojat e luftës në Iran po reflektohen menjëherë në tregjet e energjisë dhe në rritjen e kostove për konsumatorët dhe bizneset në të gjithë kontinentin.

Komisioni Evropian ka prezantuar një paketë masash emergjente për të frenuar ndikimin e rritjes së çmimeve të energjisë, duke paralajmëruar se Bashkimi Evropian po përballet me një krizë të përsëritur të varësisë nga importet e lëndëve djegëse fosile. Sipas të dhënave zyrtare, BE ka shpenzuar miliarda euro shtesë vetëm si pasojë e rritjes së çmimeve të energjisë, pa rritur sasinë e furnizimeve.

Plani i ri përfshin krijimin e një strukture të posaçme evropiane për koordinimin e furnizimeve me karburant dhe menaxhimin e rezervave kombëtare, me synimin për të shmangur mungesat dhe krizën e furnizimit në shtetet anëtare.

Sektori i aviacionit është një nga më të goditurit, me paralajmërime për mungesa të mundshme të karburantit dhe rritje të ndjeshme të kostove operative. Disa kompani ajrore kanë njoftuar reduktim të fluturimeve, ndërsa industria kimike dhe ajo prodhuese po përballen me rritje të çmimeve dhe rrezik mbylljesh fabrikash.

Në sektorin ushqimor dhe bujqësor, rritja e kostove të energjisë ka ndikuar edhe në çmimet e plehrave kimike dhe produkteve bazë, duke krijuar presion të shtuar mbi zinxhirin e furnizimit.

Ekonomistët paralajmërojnë se nëse situata vijon, Evropa mund të përballet me një ngadalësim të ndjeshëm ekonomik ose edhe recesion, ndërsa inflacioni pritet të mbetet i lartë në muajt në vijim.

Në këtë sfond, qeveritë evropiane po përshpejtojnë investimet në energji të rinovueshme, në një përpjekje për të ulur varësinë nga importet dhe për të stabilizuar tregun energjetik në afatgjatë.