Si ra Irani nga brenda, tradhtari i padukshëm dhe roli vendimtar i Mossadit

Media të ndryshme ndërkombëtare dhe arabe kanë publikuar raportime të gjera mbi një operacion shumëvjeçar spiunazhi të shërbimit sekret izraelit Mossad brenda Iranit, i cili sipas tyre ka përfshirë qindra agjentë të rekrutuar, operacione të fshehta dhe mbikëqyrje të gjerë teknologjike.

Sipas këtyre raportimeve, operacioni i inteligjencës izraelite ka zgjatur për më shumë se tre dekada dhe ka përfshirë infiltrimin në strukturat ushtarake dhe shtetërore iraniane, duke përdorur metoda të ndryshme si përgjime telefonike, analizë të rrjeteve sociale, përdorimin e algoritmeve për identifikimin e objektivave dhe hakimin e kamerave të trafikut dhe antenave të telekomunikacionit.

Në qendër të pretendimeve është emri i gjeneralit të Gardës Revolucionare dhe komandantit të Forcës Quds, Ismail Qaani. Sipas mediave arabe, ai u ekzekutua të premten nga autoritetet iraniane pasi dyshohej se kishte bashkëpunuar me Mossadin.

Raportimet pretendojnë se Qaani kishte marrë pjesë në disa takime me figura të rëndësishme të organizatave që konsiderohen armiq të Izraelit dhe se disa prej tyre u vranë nga operacione të ushtrisë izraelite ose nga Mossadi pak kohë pas këtyre takimeve, gjë që ngriti dyshime tek autoritetet iraniane.

Sipas burimeve mediatike, gjenerali iranian i kishte shpëtuar disa sulmeve të dyshuara izraelite gjatë viteve të fundit. Dyshimet ndaj tij u shtuan pasi ai kishte qenë i pranishëm në takime me udhëheqës të lartë rajonalë që më pas u shënjestruan nga sulme të Izraelit.

Disa raportime flasin edhe për një operacion të gjerë të inteligjencës që përfshinte bashkëpunimin mes Mossadit dhe njësisë elitare të inteligjencës izraelite 8200, e cila merret me përgjime elektronike dhe operacione kibernetike. Sipas mediave ndërkombëtare, kjo njësi dyshohet se ka përdorur edhe analiza të mëdha të të dhënave dhe inteligjencë artificiale për identifikimin e objektivave.

Raportimet përmendin gjithashtu një rrjet të gjerë informatorësh dhe agjentësh të rekrutuar brenda Iranit, përfshirë civilë dhe refugjatë që ndihmonin në mbledhjen e informacionit mbi zyrtarët ushtarakë dhe shkencëtarët e lidhur me programin bërthamor iranian.

Megjithatë, shumë nga këto pretendime mbeten të pakonfirmuara zyrtarisht. Autoritetet iraniane dhe izraelite nuk kanë dhënë komente të detajuara për raportimet, ndërsa disa ekspertë të sigurisë theksojnë se një pjesë e informacioneve mund të përfshijë edhe elementë spekulativë ose të pa verifikuar.

Izraeli dhe Irani kanë qenë prej vitesh të përfshirë në një luftë të fshehtë inteligjence që përfshin sabotime, sulme kibernetike dhe atentate ndaj figurave të lidhura me programin bërthamor iranian, një konflikt që shpesh zhvillohet larg vëmendjes publike./Ballkan