Thrilleri i një vrasjeje në Francë: Identifikohet viktima e një ekzekutimi para 20 vitesh

Një grua e gjetur e vrarë në Francë më shumë se 20 vite më parë është identifikuar më në fund si Hakima Boukerouis, ndërsa autoritetet kanë arrestuar një të dyshuar në lidhje me ngjarjen.

Trupi i saj ishte zbuluar në janar të vitit 2005 në fshatin Saint-Quirin, në verilindje të Francës, i fshehur në një fuçi uji dhe i mbështjellë me qese plastike. Për vite me radhë, viktima kishte mbetur e paidentifikuar dhe në dosjet hetimore njihej si “gruaja me kurorën dentare Richmond”, për shkak të një ndërhyrjeje dentare që kishte ndihmuar hetuesit në karakterizimin e saj.

Identifikimi u bë i mundur përmes analizës së ADN-së familjare, në kuadër të nismës ndërkombëtare “Operation Identify Me”, e cila synon të zbardhë identitetin e grave të panjohura të gjetura të vdekura në Europë.

Ky është gjithashtu rasti i parë brenda kësaj fushate ku raportohet edhe një arrestim i lidhur me vrasjen.

Sipas Interpol-it, Boukerouis ishte 34 vjeçe në momentin e vdekjes dhe kishte lindur në Algjeri. Hetimet për rastin dhe për personin e arrestuar po vijojnë, ndërsa autoritetet nuk kanë dhënë ende detaje të tjera mbi të dyshuarin.

Rasti konsiderohet një nga përparimet më të rëndësishme në hetimet ndërkombëtare për viktimat e paidentifikuara të krimeve të vjetra në Europë.