Zjarr masiv në një ndërtesë në ndërtim në Moskë, 7 të vdekur dhe 13 të plagosur

Të paktën shtatë persona kanë humbur jetën dhe 13 të tjerë janë plagosur si pasojë e një zjarri të madh që shpërtheu në një ndërtesë në ndërtim në veri të Moskës.

Sipas autoriteteve ruse, flakët përfshinë një godinë shumëkatëshe të papërfunduar në lagjen Aeroport, duke u përhapur me shpejtësi në katin e dytë dhe të tretë, ndërsa brenda ndodheshin dhjetëra persona.

Shërbimet e emergjencës bënë të ditur se më shumë se 30 persona u shpëtuan nga vendi i ngjarjes, ndërsa dyshohet se deri në 200 persona mund të kenë qenë në ndërtesë në momentin e shpërthimit të zjarrit.

Zjarrfikësit përdorën mjete ngritëse për të arritur në katet e sipërme, ndërsa ekipet e shpëtimit operuan në ambiente të mbushura me tym të dendur.

Autoritetet konfirmuan se zjarri është vënë nën kontroll, ndërsa prokuroria ka nisur hetime penale për shkelje të mundshme të rregullave të sigurisë në ndërtim.