Vaksina HPV ul ndjeshëm rrezikun e kancerit të qafës së mitrës

Një studim i gjatë 18-vjeçar i realizuar në Suedi ka treguar se vaksina kundër HPV është jashtëzakonisht efektive në parandalimin e kancerit të qafës së mitrës tek vajzat dhe gratë e reja.

Hulumtimi ndoqi më shumë se 900,000 pjesëmarrëse dhe rezultoi se të vaksinuarat kishin një rrezik shumë më të ulët për të zhvilluar kancer krahasuar me të pavaksinuarat.

Ekspertët theksojnë se koha e vaksinimit është vendimtare: vajzat që vaksinohen para moshës 17 vjeç kanë rreth katër herë më pak gjasa të preken më vonë.

Vaksina parandalon infeksionin nga tipet më të rrezikshme të HPV-së, të cilat shkaktojnë shumicën e rasteve të kancerit të qafës së mitrës, dhe gjithashtu mbron nga kancere të tjera që lidhen me virusin, përfshirë kancerin e fytit, anusit dhe organeve gjenitale.

Mjekët nënvizojnë se vaksina siguron mbrojtje afatgjatë, duke “trajnuar” sistemin imunitar që të neutralizojë virusin para se ai të dëmtojë qelizat.

Për këtë arsye, programet shkollore të imunizimit rekomandojnë vaksinimin e adoleshentëve, për të garantuar mbrojtje në periudhën më të nevojshme.