Rrjedhje kimike në Gjermani, humb jetën një punëtor, 17 të tjerë përfundojnë në spital

Një punëtor humbi jetën dhe 17 persona të tjerë mbetën të plagosur pas një rrjedhjeje kimike në një objekt industrial në Nuremberg, duke shkaktuar alarm dhe një ndërhyrje të gjerë të shërbimeve të emergjencës.

Ngjarja ndodhi pasditen e së premtes në një park industrial të qytetit gjerman, ku autoritetet lokale dhe ekipet e emergjencës u mobilizuan menjëherë për të vënë situatën nën kontroll.

Sipas policisë, dy punëtorë u gjetën pa ndjenja brenda ambienteve të kompanisë. Njëri prej tyre ndërroi jetë më vonë në spital, ndërsa për gjendjen shëndetësore të personave të tjerë nuk janë dhënë ende detaje të plota.

Autoritetet në Bavaria deklaruan se rrjedhja kimike u izolua në kohë brenda ndërtesës dhe se aktualisht nuk paraqet rrezik për shëndetin publik.

Deri më tani nuk është bërë e ditur se çfarë lënde kimike ka rrjedhur dhe as shkaqet që çuan në incident.

Sipas raportimeve të Deutsche Presse-Agentur, rreth 65 zjarrfikës, disa prej tyre të pajisur me kostume speciale mbrojtëse kimike, morën pjesë në operacionin e emergjencës dhe evakuuan dhjetëra punëtorë nga objekti.