U plagos në sulmin në Liban, vdes edhe ushtari i dytë francez i UNIFIL

Një ushtar i dytë francez nga misioni paqeruajtës i UNIFIL në Liban ka ndërruar jetë si pasojë e plagëve të marra gjatë një sulmi që Franca e ka atribuar luftëtarëve të Hezbollahut.

Sipas Presidentit francez Emmanuel Macron, rreshter-major Anisette Girardin ka vdekur më 22 prill nga komplikimet e plagëve të rënda, pasi ishte riatdhesuar nga Libani, ku ishte plagosur në të njëjtën pritë që i mori jetën edhe rreshterit Florian Montorio.

Macron deklaroi se ushtari “vdiq për Francën”, duke shtuar se vendi do t’i bëjë homazh të dy ushtarëve të rënë dhe do të nderojë sakrificën e tyre. Ai shprehu gjithashtu ngushëllime për familjet e viktimave dhe vlerësoi angazhimin e forcave të armatosura franceze në misionin e OKB-së në Liban.

Sipas autoriteteve franceze, sulmi ndodhi gjatë një prite të organizuar kundër forcave të UNIFIL, ku u plagosën gjithashtu edhe dy ushtarë të tjerë francezë.

Parisi ka akuzuar përgjegjës për sulmin lëvizjen Hezbollah, e cila vepron në jug të Libanit, ndërsa kjo e fundit ka mohuar përfshirjen në incident.

Ngjarja ka rritur tensionet në rajon dhe ka theksuar rrezikun me të cilin përballen forcat paqeruajtëse në zonat e konfliktit.