Armë dhe drogë në apartament në Britani/ Shqiptari justifikohet: Kisha borxhe nga sëmundja e vajzës

Një emigrant shqiptar i paligjshëm është dënuar me 7 vite e 10 muaj burg në Mbretërinë e Bashkuar, pasi policia zbuloi një arsenal armësh dhe rreth 10 kg drogë gjatë një kontrolli në një apartament në Nottingham.

Sipas autoriteteve britanike, në banesë u gjet një revolver i fshehur në dollap kuzhine, si dhe tre pushkë, njëra prej të cilave e mbushur, të mbështjella në një qilim pranë një shtrati. Po ashtu u sekuestruan edhe sasi kanabisi të paketuara, përfshirë disa pako njëkilogramëshe dhe qindra gramë të tjera, duke e konsideruar apartamentin si një pikë magazinimi për lëndë narkotike dhe armë.

I dënuari, 41-vjeçari Ervis Doksani, baba i dy fëmijëve, kishte hyrë në Mbretërinë e Bashkuar ilegalisht dhe më herët ishte deportuar dy herë. Gjykata e Kurorës në Nottingham e cilësoi atë si pjesë të një rrjeti më të gjerë të krimit të organizuar, duke theksuar se ai kishte rol në ruajtjen dhe administrimin e armëve dhe drogës.

Gjatë seancës, mbrojtja pretendoi se ai ishte detyruar të përfshihej për shkak të borxheve dhe vështirësive personale, ndërsa vetë i pandehuri ka deklaruar se disa nga armët i kishte menduar si imitime. Megjithatë, gjykata theksoi seriozitetin e veprës, duke vendosur dënimin me burgim të gjatë.

“Ju keni provuar përmes dënimeve tuaja të mëparshme në këtë vend dhe përmes kësaj vepre penale se jeni ajo që unë e gjykoj si një kriminel karriere. Një sasi e madhe droge dhe armësh u sekuestrua, dhe ky rast tregon se jeni i lidhur me një nivel më të lartë të krimit të organizuar.

Ju ishit në fakt magazinieri, mund të mos keni qenë përgjegjës për këtë ndërmarrje, por ju besohej dhe kishit një ide për shkallën e operacionit dhe po e bënit atë për avantazh të konsiderueshëm financiar. Nuk lejoheni këtu, dhe nuk jeni të mirëpritur këtu sepse prania juaj këtu është për të fituar para për veten tuaj përmes sjelljes kriminale”, tha gjyqtari Mark Watson.

“Ishte qartë një vend magazinimi dhe ai ishte përgjegjës për t’u kujdesur për të. Kishte nëntë pako të tjera 1 kg me kanabis të mbyllur në vakum dhe një sasi tjetër prej 340 g kanabis. Në apartament ishte një pistoletë dhe katër armë të tjera, njëra prej të cilave në një dollap kuzhine ishte shkurtuar.

Pranë një dysheku ishte një qilim që përmbante tre pushkë, njëra prej të cilave ishte e mbushur dhe u gjet edhe municion. Në intervistë, ai tha se kishte një borxh prej 32,000 eurosh dhe se po detyrohej të punonte ilegalisht.

Ai besonte se disa nga armët ishin imitime, lodra ose armë ajrore, po punonte për të shlyer një borxh të grumbulluar nga sëmundja e vajzës së tij. Shqiptari kishte punuar në kantiere ndërtimi, por kur u bënë kontrolle për ligjshmërinë e tij për të punuar këtu, ai e humbi atë punë dhe u bë përsëri i pastrehë. Ai gjithmonë planifikonte të kthehej në Shqipëri sa më shpejt të mundej”, tha prokurorja Esther Harrison.