Çfarë mund të bëjë ushtria amerikane nëse Irani nuk i përgjigjet ultimatumit të Trump-it

Presidenti amerikan Donald Trump ka dhënë një ultimatum ndaj Iranit, duke paralajmëruar se një qytetërim i tërë mund të preket nëse regjimi nuk pranon marrëveshjen brenda afatit të vendosur.

Ai ka kërcënuar se SHBA do të shkatërrojë infrastrukturën kyçe, duke përfshirë ura dhe centrale energjetike, brenda vetëm disa orësh, një paralajmërim që ekspertët ushtarakë e konsiderojnë të vështirë për t’u realizuar në praktikë.

Analistët thonë se, megjithëse shkatërrimi i çdo ure është i pamundur, goditja ndaj sektorit energjetik të Iranit mund të shkaktojë një ndikim të rëndë ekonomik dhe të rrisë presionin mbi regjimin.

Shumica e centraleve dhe rafinerive ndodhen në provincat bregdetare Bushehr, Khuzestan dhe Hormozgan, ku një ndërhyrje mund të ndikojë edhe në trafikun në Ngushticën e Hormuzit dhe eksportet e naftës.

Megjithatë, zyrtarët amerikanë dhe analistët e sigurisë paralajmërojnë se Irani ka treguar një prag të lartë durimi dhe nuk pritet të nënshkruajë shpejt një armëpushim.

Popullsia iraniane përballet tashmë me ndërprerje të energjisë dhe problemet e sektorit energjetik nuk janë të reja, gjë që mund të kufizojë efektin presionues të një sulmi të ri amerikan.