FBI dhe Agjencia për Mbrojtjen e Mjedisit paralajmërojnë për sulme kibernetike iraniane ndaj sistemeve të ujit në SHBA

FBI-ja dhe Agjencia për Mbrojtjen e Mjedisit (EPA) kanë lëshuar një paralajmërim për një kërcënim kibernetik të lidhur me Iranin, që synon sistemet e ujit dhe të kanalizimeve në Shtetet e Bashkuara.

Sipas mediave amerikane, sulmet po kompromentojnë teknologjitë e përdorura në sistemet e furnizimit me ujë të pijshëm dhe menaxhimin e ujërave të zeza, megjithëse paralajmërimi nuk specifikon se cilat zona apo sisteme janë prekur.

FBI-ja sqaroi se qëllimi i paralajmërimit është “të sigurojë që organizatat të jenë në pozicionin më të mirë për të mbrojtur veten”.

Autoritetet theksuan rëndësinë e marrjes së masave parandaluese për të mbrojtur infrastruktura kritike dhe për të parandaluar ndikime serioze në furnizimin me ujë dhe shëndetin publik.

Ekspertët këshillojnë që operatorët e këtyre sistemeve të rrisin monitorimin e rrjeteve dhe të përforcojnë protokollet e sigurisë, ndërsa autoritetet federale do të vazhdojnë të ofrojnë udhëzime për mbrojtje nga kërcënimet kibernetike.