“SHBA kërkon të nisë një luftë të re”/ Kryetari i Parlamentit iranian: Po përgatitemi për çdo sulm

Kryetari i Parlamentit të Iranit, Mohammad Bagher Ghalibaf, ka akuzuar Shtetet e Bashkuara se po kërkojnë të nxisin një konflikt të ri, ndërsa tensionet mes Teheranit dhe Uashingtonit vijojnë të mbeten të larta.

Në një mesazh audio të transmetuar nga mediat iraniane, Ghalibaf deklaroi se “manovrat e armikut, si të hapura ashtu edhe të fshehta”, tregojnë se SHBA-të nuk kanë hequr dorë nga qëllimet e tyre ushtarake, pavarësisht presionit ekonomik dhe politik.

Ai shtoi se Irani duhet të përshpejtojë përgatitjet për t’iu përgjigjur çdo sulmi të mundshëm, duke theksuar se vendi i tij “nuk do t’i nënshtrohet kurrë kërcënimeve”.

Zyrtari iranian po ashtu u shpreh se ushtria e Iranit ka shfrytëzuar periudhën e armëpushimit për të riorganizuar forcat e saj, në kuadër të rritjes së gatishmërisë ushtarake.