Enkileda Carja shkëlqen në Kampionatin Europian në Batumi, thyen dy rekorde

Peshëngritësja shqiptare Enkileda Carja ka mbyllur një paraqitje të jashtëzakonshme në Kampionatin Europian që po zhvillohet në Batumi të Gjeorgjisë, duke u kthyer në një nga emrat më të spikatur të kompeticionit.

Carja dominoi në stilin e shkëputjes, ku arriti të ngrejë 103 kilogramë, duke vendosur një rekord të ri europian për moshat e reja. Performanca e saj nuk u ndal me kaq, pasi në stilin e shtytjes ajo realizoi me sukses 123 kilogramë, duke treguar stabilitet dhe nivel të lartë teknik në të dy disiplinat.

Me këto rezultate, sportistja shqiptare arriti të thyejë dy rekorde europiane: një në shkëputje dhe një tjetër në totalin e dygarëshit, duke e mbyllur garën me një sukses të plotë dhe historik.

Ky rezultat përbën një arritje të rëndësishme për peshëngritjen shqiptare në arenën ndërkombëtare, duke konfirmuar potencialin dhe nivelin elitar të Enkileda Carjës, e cila vazhdon të ngrejë lart flamurin kuqezi në kompeticionet më të rëndësishme europiane.