Gjykata e Posaçme dënon Rezart Taçin me 11 vite burg për pastrim parash të mafies italiane

Gjykata e Posaçme për Krimet e Rënda ka shpallur sot vendimin ndaj biznesmenit shqiptar Rezart Taçi, i cili u gjet fajtor për pastrim parash në favor të mafies italiane, Cosa Nostra, dhe u dënua me 11 vite burgim. SPAK kishte kërkuar 13 vite burg.

Prokurori Klodian Braho, gjatë seancës, kërkoi gjithashtu konfiskimin e mbi 18 milionë eurove të depozituara në një llogari në Tiranë dhe që u tentua të shpërndaheshin në llogari në Hong Kong dhe Singapor.

Paratë ishin pjesë e një skeme për pastrimin e fondeve të mafies, ku biznesmeni shqiptar dyshohet se do të fitonte rreth 3 milionë euro.

Operacioni i hetuar nga prokurori Braho ka përfshirë edhe disa shtetas italianë, përfshirë Francesco Zummo, Fabio Petruzzella dhe Daniele Cestagalli, të cilët janë hetuar për favorizimin e Cosa Nostras.

Paratë u depozituan në një bankë të nivelit të dytë, me pretendimin se do të investoheshin në hidrokarbure.

SPAK ka përdorur si prova edhe një draft-marrëveshje që parashikonte një hua prej 18 milionë eurosh me normë interesi 5%, duke treguar qartësisht përpjekjen për të legjitimuar fondet.

Falë ndërhyrjes së SPAK, një pjesë e vlerës monetare u bllokua dhe konfiskua më parë me vendim gjyqësor.