Zhdukja e Eraldo Muçit, gjykata urdhëron kontrollin e 5 banesave! Mes tyre edhe shtëpia e “Tupes”

Kur ka kaluar thuajse një muaj nga zhdukja e Eraldo Muçit, shoku i besuar i Aleksandër Sadikajt, gjykata ka urdhëruar kontrollin në 5 banesa. Mes tyre është lëshuar urdhër kontrolli edhe për banesën e Donald Nelës, i njohur dhe me pseudonimin “Tupja”.

Mësohet se Nela ka qenë edhe kontakti i fundit i Eraldo Muçit para zhdukjes.

Kujtojmë se kanë qenë prindërit e 30-vjeçarit Eraldo Muçi që kanë bërë kallëzim në polici dhe apelojnë që strukturat të hetojnë për të zbardhur të vërtetën për zhdukjen e djalit të tyre të vetëm. Para se të zhdukej, Eraldo ka ndaluar tek ferma e kuajve të familjes Sadikaj dhe më pas ka udhëtuar drejt Durrësit. Burime policore thanë se për herë të fundit, i riu është parë në autostradën Durrës-Tiranë dhe nga ai moment nuk ka asnjë të dhënë rreth tij.

Familja ngre dyshime të forta se atij mund t’i ketë ndodhur diçka e rëndë për motive hakmarrje, por policia nuk përjashton as pista të tjera. 30-vjeçari i zhdukur pa gjurmë, ishte një nga miqtë e besuar të Aleksandër Sadikajt, i njohur si Sanço. Ky i fundit u ekzekutua në qershor të 2022 në një atentat mafioz në afërsi të rrethrrotullimit të Saukut, ku automjeti i tij shpërtheu nga një sasi e madhe tritoli që ishte vendosur në të.

Pas kësaj ngjarje, mes grupit të tij dhe grupit kundërshtar të vëllezërve Edmond Papa e Kristo Qirici janë shënuar disa ngjarje të rënda kriminale. Pas tij u vra Edmond Papa nga grupi kundërshtar.

Kushërinjtë e Sadikajt, Adriatik Kalemi e Zamir Kalemi iu mbijetuan të paktën dy atentateve mafioze në Greqi e Tiranë. Më pas u shënua ajo që njihet si masakra e Memaliajt, ku u vra Shyqyri Kalemi, babai i Adriatik e Zamir Kalemit dhe dy persona të tjerë, kamerieri dhe një klient i lokalit.