Trump paralajmëron Iranin: Nëse sulmoni anijet amerikane, do t’ju zhdukim nga faqja e dheut!

Tensionet në Ngushticën e Hormuzit vijojnë të përshkallëzohen pas disa incidenteve të raportuara së fundmi, përfshirë përfshirjen e një anijeje të Koresë së Jugut në një aksident dhe pretendimet e Iranit për goditjen e një shkatërruesi amerikan, të cilat janë mohuar nga Uashingtoni.

Sipas mediave amerikane, forcat e SHBA-së janë autorizuar të ndërmarrin veprime kundër motoskafeve të Gardës Revolucionare Iraniane në rast nevoje, ndërsa Irani ka paralajmëruar për skenarë të tjerë të mundshëm reagimi.

Në këtë klimë të tensionuar, në deklaratat në Fox News, Trump tha se Irani “do të zhduket nga faqja e dheut” nëse guxon të sulmojë anijet amerikane që shoqërojnë anijet.

Ai gjithashtu vlerësoi se Irani “ka treguar fleksibilitet më të madh në negociatat e paqes”.

Deklarata e tij vjen ndërsa situata në rajon mbetet e brishtë, me SHBA-të që thonë se ruajnë kontroll dhe gatishmëri të plotë në Ngushticën e Hormuzit.

Ndërkohë, në një postim në Truth Social ai i referohet incidentit me anijen e Koresë së Jugut , duke i bërë thirrje Seulit të bashkohet me misionin për largimin e anijeve.

Presidenti amerikan shkruan:

“Irani ka sulmuar vende që nuk kanë të bëjnë fare me ‘Operacionin Liria’, përfshirë një anije mallrash të Koresë së Jugut. Ndoshta është koha që Koreja e Jugut t’i bashkohet misionit! Ne kemi shkatërruar shtatë anije të vogla ose, siç u pëlqen t’i quajnë, ‘anije të shpejta’. Ato janë të vetmet që u kanë mbetur. Përveç anijes së Koresë së Jugut, deri më tani nuk ka pasur dëme gjatë kalimit nëpër Ngushticë. Sekretari i Mbrojtjes Pete Hegseth dhe Kryetari i Shtabit të Përbashkët Dan Kaine do të mbajnë një konferencë për shtyp nesër [të martën] në mëngjes”.