Zjarri te vila e ish-diktatorit Hoxha, Berisha: Agjentë të infiltruar mashtruan protestuesit e PD, u thanë që ishte Rama brenda

Sali Berisha ka justifikuar sulmin e militantëve të tij në vilën e ish-diktatorit Enver Hoxha, me argumentin se, sipas tij, protestuesit kishin informacion se aty qëndronte kryeministri Edi Rama.

“Një marshim triumfi si marshi juaj sot. Kjo datë, 28 shkurti, do të shkruhet në historinë e kryengritjes paqësore të shqiptarëve kundër narkoshtetit.

Për tre orë, marshi juaj ishte marshi i fitores, marshi i shqiptarëve, i dinjitetit, i guximit. Ishte mesazhi më i shkëlqyer që ju i dërguat çdo shqiptari; ishte mesazhi më i madh që i dërguat miqve tanë në Europë dhe në botë. Ishte tmerri që i kallët në datë Edi Ramës.

Molotovi në vilën e Enver Hoxhës u hodh pasi protestuesit kishin informacion se në shtëpinë e diktatorit banonte Edi Rama.

Kjo çoi në një urrejtje të jashtëzakonshme. Por Rama nuk banonte aty; banonte te vila e Mehmet Shehu. Edi Rama, ta dimë ku je: në Surrel apo te vila e Mehmet Shehut”, tha mes të tjerash Berisha./Shqiptarja