Infeksioni nga Helicobacter pylori çfarë është, si njihet dhe sa mund të jetë i rrezikshëm

Helicobacter pylori është një bakter që jeton në mukozën e stomakut, një mjedis që zakonisht nuk favorizon mbijetesën e mikroorganizmave. Dhe në shumë raste, bakteri mbetet i heshtur pa shkaktuar dëme, ndërsa në raste të tjera mund të bëhet agresiv.

“Shumë persona bashkëjetojnë me këtë infeksion pa e kuptuar dhe pa pasoja në stomak. Megjithatë, ndonjëherë ky bakter mund të shkaktojë një inflamacion të mukozës gastrike, pra gastrit — shpjegon profesor Alessandro Repici, përgjegjës i Njësisë Operative të gastroenterologjisë dhe endoskopisë digjestive në Institutin Humanitas —. Në këto raste, inflamacioni mund të zhvillohet në ulçerë (gastrike dhe sidomos duodenale) ose, në afat të gjatë, të favorizojë zhvillimin e kancerit të stomakut, sidomos te familjarët e shkallës së parë të pacientëve që kanë pasur këtë tumor. Edhe një lloj i rrallë i limfomës gastrike (MALT) lidhet me praninë e Helicobacter-it. Për këtë arsye, njohja e infeksionit dhe trajtimi i tij është shumë i rëndësishëm.*

“Nuk ka një shenjë të vetme dhe të sigurt, megjithatë shpesh inflamacioni i shkaktuar nga bakteri sjell shqetësime në stomak, si dhimbje ose djegie në stomak, të përziera, ndjesi fryrjeje ose ngopje të hershme pas vakteve. Këto simptoma mund të kenë shumë shkaqe të ndryshme, prandaj për të diagnostikuar infeksionin duhet të përdoren teste specifike si ure breath test (testi i frymës), i cili mat praninë e bakterit përmes një mostre të ajrit të nxjerrë, ose analiza e feçeve. Në disa raste, sidomos kur ka simptoma më të forta ose faktorë rreziku, mjeku mund të rekomandojë gastroskopinë me biopsi.*

“Përdoren terapi të kombinuara me dy ose tre antibiotikë të shoqëruar me një ilaç që ul aciditetin e stomakut. Ulja e aciditetit e bën mjedisin më pak të favorshëm për bakterin dhe rrit efektivitetin e antibiotikëve. Terapia duhet ndjekur me saktësi, përndryshe ulen mundësitë e suksesit dhe rritet rreziku që bakteri të bëhet rezistent.”

Edhe pse infeksioni nga Helicobacter pylori është shkaku më i zakonshëm i gastritit kronik, ky inflamacion i mukozës së stomakut mund të ketë edhe “fajtorë” të tjerë.

“Në vitet e fundit është vënë re një rritje e gastriteve nga barnat, të cilat përbëjnë rreth një të tretën e të gjitha rasteve. Kjo formë gastriti lidhet me përdorimin e tepruar të barnave anti-inflamatore jo-steroide, si për qëllime qetësuese të dhimbjes, ashtu edhe për parandalim kardiovaskular (aspirina në doza të ulëta e marrë si antiagregant trombocitar) — thekson Repici —. Edhe stili i jetesës dhe ushqyerja shpjegojnë një numër të konsiderueshëm rastesh gastriti. Tepricat ushqimore, vaktet e pasura me yndyrna shtazore dhe ‘tepricat’ me alkool që gjithnjë e më shumë të rinj bëjnë gjatë fundjavave janë të gjitha faktorë që mund të inflamojnë mukozën e stomakut. Nëse pastaj shtohen stresi dhe duhani, rreziku rritet edhe më shumë.”