Kriza në Lindjen e Mesme godet aviacionin: Mungesë karburanti në aeroportet italiane, rrezik për sezonin veror

Përshkallëzimi i tensioneve në Lindja e Mesme po jep efektet e para konkrete në Europë, ku disa aeroporte në Itali po përballen me mungesë të karburantit për avionë. Situata ka ngritur shqetësime serioze për udhëtimet ajrore, sidomos në prag të sezonit veror.

Sipas njoftimeve aeronautike, disa aeroporte si Brindisi po operojnë me sasi shumë të kufizuara kerozine, duke detyruar kompanitë ajrore të planifikojnë furnizimin që në aeroportet e mëparshme. Në disa raste, prioritet po u jepet vetëm fluturimeve shtetërore, emergjente dhe mjekësore, ndërsa fluturimet komerciale mund të përballen me vështirësi.

Kufizime janë raportuar edhe në aeroporte të tjera si Milano Linate, Venecia dhe Bolonja, ndërsa situata mbetet dinamike dhe e paqartë. Një nga arsyet kryesore lidhet me tensionet në Ngushtica e Hormuzit, një pikë kyçe për transportin global të naftës, ku çdo bllokim ndikon drejtpërdrejt në furnizimin me energji.

Ekspertët paralajmërojnë se nëse situata vazhdon, pasojat mund të ndihen jo vetëm në disponueshmërinë e fluturimeve, por edhe në çmimet e biletave, të cilat pritet të rriten ndjeshëm. Kompani të mëdha ajrore si Ryanair dhe Lufthansa kanë sinjalizuar tashmë rrezikun e ndërprerjeve dhe kostove më të larta operative.