Megaoperacioni i INTERPOL, 158 arrestime në 40 shtete! 120 persona të rënë pre e trafikut të qenieve njerëzore

Një total prej 158 personash u arrestuan në qershor gjatë një operacioni të madh ndërkombëtar kundër trafikimit të qenieve njerëzore të kryer nga autoritetet policore në rreth 40 vende, njoftoi sot Interpoli.

Operacioni, i cili u zhvillua nga 1 deri më 6 qershor dhe u drejtua nga forcat e rendit austriake dhe rumune, u përqendrua te viktimat e shfrytëzimit seksual, kriminalitetit të detyruar dhe lypjes së detyruar. U identifikuan një total prej 1,194 viktimash të mundshme, që vinin nga 64 vende, kryesisht Rumania, Ukraina, Kolumbia dhe Kina, të cilët ndonjëherë transportoheshin përtej kufijve kombëtarë dhe madje kontinentalë, tha Interpoli në një deklaratë, e cila u koordinua me Europolin dhe Frontex-in.

“Rreth 15,000 agjentë” nga autoritetet “nga 43 vende morën pjesë në operacion”, tha organizata ndërkombëtare me seli në Lyon.

“Shumica e viktimave të shfrytëzimit seksual të identifikuara falë operacionit ishin gra”, ndërsa viktimat e mitura “shpesh shfrytëzoheshin për lypje të detyruar ose aktivitete kriminale të detyruara si vjedhja e çantave ose xhepave”, thuhet në deklarata.

Shumë nga këto viktima u shfrytëzuan nga anëtarët e familjeve të tyre. Si pjesë e këtij operacioni, policia federale braziliane shkatërroi një rrjet që rekrutonte viktima përmes ofertave të rreme të punës dhe më pas i transportonte ato në Mianmar për shfrytëzim seksual.

Në Itali, policia identifikoi 75 viktima të mundshme nga Rumania, Kina dhe Kolumbia gjatë bastisjeve në sallone masazhi. Gjatë bastisjeve u sekuestruan gjithashtu drogë dhe armë zjarri.

Ndërkohë, policia tajlandeze shkatërroi një rrjet prostitucioni me fëmijë që vepronte përmes “një platforme të njohur të mediave sociale”.