"Clirohen" trotuaret në Vlorë! Kryebashkiaku Dredha: Do merren masa edhe përtej gjobave...

Kryeministri Edi Rama dha të dielën një ultimatum prej 48-orësh për lirimin e trotuarëve në zonën e Lungomares në Vlorë, teksa menjëherë më pas ka nisur aksioni në qytetin bregdetar.

Përmes një postimi në rrjete sociale, kryebashkiaku Ermal Dredha bën me dije se aksioni i ekipeve të Policisë Bashkiake dhe IMT-së, për lirimin e hapësirave publike nga zaptimi i papranueshëm ka vijuar përgjatë të dielës deri pas mesnate. Siç shihet edhe në fotot e mëposhtme, inspektorët kanë ndërhyrë duke liruar hapësirat publike nga bizneset, sipas kërkesës së kreut të qeverisë. 

Po ashtu, Dredha njofton marrjen e masave për të gjithë ata që zaptojnë ambientet e përbashkëta, që shkojnë përtej gjobave të vendosura orët e fundit. 

"Ka vijuar përgjatë gjithë ditës së djeshme, deri pas mesnate, aksioni i ekipeve të Policisë Bashkiake dhe IMT-së, për lirimin e hapësirave publike nga zaptimi i papranueshëm! Ambientet e përbashkëta i përkasin komunitetit dhe ndaj kujtdo që do t'i trajtojë si të tijat, do të merren masa që shkojnë edhe përtej gjobave që janë vënë gjatë këtyre orëve!", njofton Dredha.